काठमाण्डौ ,प्रधानमन्त्री वालेन्द्र शाह (बालेन) ले राष्ट्रिय योजना आयोग र नीति अनुसन्धान प्रतिष्ठानजस्ता निकायलाई खारेज गर्नुको सट्टा सुधारमार्फत सुदृढ बनाई सरकारको सेवा प्रवाहलाई अझ प्रभावकारी बनाउने बताउनुभएको छ ।
प्रधानमन्त्री तथा मन्त्रिपरिषद्को कार्यालयमा हिजो आयोगका पदाधिकारी तथा कर्मचारीसँग भएको छलफलमा प्रधानमन्त्री शाहले योजना निर्माण र नीतिगत अनुसन्धान व्यवस्थित भएमा मात्र सरकारलाई सेवा प्रवाहमा सहजता मिल्ने बताउनुभयो । यी निकायलाई सुधार गर्न सके सरकार सञ्चालनमा ठूलो सहयोग पुग्ने उहाँको भनाइ छ ।
नीति अनुसन्धान प्रतिष्ठानका सन्दर्भमा उहाँले विषय विज्ञ र अनुसन्धानकर्ताको महत्त्व रहने बताउनुभयो । प्रधानमन्त्री शाहले कुनै पनि बहानाबाजी नगरी बिना सङ्कोच नतिजा निकाल्ने गरी काम गर्न दुवै निकायलाई निर्देशन दिनुभयो ।
मन्त्रालयहरूबीच समन्वय नभएको भन्ने तर्क स्वीकार्य नहुने भन्दै उहाँले एउटै सरकार मातहत त्यस्तो समस्या हुन नहुने बताउनुभयो । साथै, बजेट र कानुनी जटिलतालाई काम नगर्ने बहानाका रूपमा प्रयोग नगर्न उहाँले सचेत गराउनुभयो ।
कार्यक्रममा अर्थमन्त्री स्वर्णिम वाग्लेले विद्यमान संस्थागत संरचनाको सुदृढीकरण, अप्रासङ्गिक प्रावधानहरूको खारेजी र नयाँ आवश्यकताअनुसार नीति विकास गर्ने प्रक्रिया थालनी गरिने जानकारी दिनुभयो ।
प्रतिष्ठानका कर्मचारीले थप जनशक्ति र स्रोतसाधनको माग गरेका छन् ।