उनले सामाजिक सञ्जालबाट गोल्छालाई पक्राउ गरिएसँगै सरकारको कार्यशैलीप्रति गम्भीर प्रश्न उठेको पनि बताएका छन्।
उनले भनेका छन्, ‘बालेन्द्र सरकारले उद्योगी–व्यवसायीमाथि गरेको धरपकडका कारण निजी क्षेत्र गम्भीर रूपमा त्रस्त बनेको छ। शंकर गोल्छाको पक्राउसँगै सरकारको कार्यशैलीप्रति गम्भीर प्रश्न उठेको छ। कुनै पनि व्यक्तिमाथि लगाइएको आरोप पहिले निष्पक्ष अनुसन्धानबाट पुष्टि हुनुपर्छ, त्यसपछि मात्र कानुनी प्रक्रियाअनुसार गिरफ्तारी गरिनुपर्छ।’
अन्यथा यस्तो कार्यशैली निजी क्षेत्रमाथिको राज्य आतंकको रूपमा बुझिने उनले बताए।
‘म, पूर्व उद्योगमन्त्रीको हैसियतले, यस प्रकारको कार्यको घोर भर्त्सना गर्दछु। देशले स्थिर, विश्वासिलो र लगानीमैत्री वातावरणको अपेक्षा गरिरहेका वेला यस किसिमका कदमले निजी क्षेत्रलाई निरुत्साहित बनाएको छ। यसले अर्थतन्त्र, रोजगारी सिर्जना र समग्र लगानी वातावरणमा प्रत्यक्ष नकारात्मक असर पार्ने स्पष्ट देखिन्छ। एकातिर आर्थिक वृद्धिदर ७ प्रतिशत पुर्याउने लक्ष्य राख्ने, अर्कोतर्फ निजी क्षेत्रलाई त्रासमा राख्ने अभ्यासले समृद्धिको यात्रामाथि नै गम्भीर प्रश्न खडा गरेको छ। सरकारले यस्ता कदम पुनर्विचार गर्दै कानुनी प्रक्रिया, पारदर्शिता र निजी क्षेत्रप्रतिको विश्वास कायम गर्ने दिशामा अघि बढ्न आवश्यक छ’, उनले भनेका छन्।
नेपाल प्रहरीको केन्द्रीय अनुसन्धान ब्युरोको टोलीले हिजो हिमालयन रिइन्स्योरेन्सका निवर्तमान अध्यक्ष शेखरलाई बिचौलिया दीपक भट्ट र सुलभ अग्रवालको जालसाजी शेयर कारोबारमा संग्लन रहेको खुलेपछि पक्राउ गरेको थियो। गोल्छा नेपाल उद्योग वाणिज्य महासंघका पूर्व अध्यक्ष पनि हुन्।
नेपाल धितोपत्र बोर्डले तयार पारेर अनुसन्धानकारी निकायमा पेस गरेको प्रतिवेदन धितोपत्र कारोबारसम्बन्धी प्रारम्भिक जाँचबुझ सुपरीवेक्षण प्रतिवेदन–२०८३ ’मा भट्ट र अग्रवालको जालसाजी कारोबारमा व्यवसायीका नेता गोल्छा पनि संलग्न रहेको देखिएको हो।