बुटवल – रुपन्देहीको सिटिजन्स बैंक इन्टरनेशनल लिमिटेडको १९औँ वार्षिकोत्सवको अवसरमा लुम्बिनी प्रदेशअन्तर्गतका शाखाहरूको संयुक्त आयोजनामा स्त्री तथा महिला रोगसम्बन्धी निःशुल्क स्वास्थ्य स्क्रिनिङ सेवा सफलतापूर्वक सम्पन्न गरिएको छ। उक्त कार्यक्रम सुद्धोधन गाउँपालिका वडा नं २ स्थित राधाकृष्ण सामुदायिक भवनमा आयोजना गरिएको थियो।
उक्त कार्यक्रममा सौ फर्साटिकर, अमुवा, छपिया तथा मानपकडी शाखाहरूको समन्वयमा दुर्गा भगवती आमा समूह (हिरापुर) तथा चेतनशील आमा समूह (गोपालपुर) अन्तर्गतका महिला दिदीबहिनी तथा आमाहरू गरी जम्मा ८१ जनाले स्वास्थ्य सेवा लिएका थिए।
कार्यक्रममा बैंकका लुम्बिनी प्रदेश प्रमुख प्रदीप कुमार श्रेष्ठले मन्तव्य व्यक्त गर्दै बैंकले आफ्नो नियमित बैंकिङ सेवाका साथै सामाजिक उत्तरदायित्व अन्तर्गत यस्ता जनमुखी कार्यक्रमहरू निरन्तर रूपमा सञ्चालन गर्दै आएको उल्लेख गर्नुभयो।
स्वास्थ्य परीक्षण सेवा बरिष्ठ स्त्री तथा प्रसूति रोग विशेषज्ञ डा। अनिता पुन तथा डा। काशी राम बीकेद्वारा प्रदान गरिएको थियो। साथै, मेडिप्लस फार्मेसीबाट आवश्यक औषधि उपलब्ध गराइएको थियो भने एशियन डायग्नोस्टिक ल्याबोरेटरीबाट ल्याब परीक्षण सेवा प्रदान गरिएको थियो।
कार्यक्रममा सिटिजन्स बैंकको तर्फबाट सौ फर्साटिकर शाखाका शाखा प्रमुख नारायण भण्डारी, अमुवा शाखा प्रमुख कृष्ण क्षेत्रीलगायत छपिया तथा मानपकडी शाखाका शाखा प्रमुखहरू तथा कर्मचारीहरूको उपस्थिति रहेको कार्यक्रमको व्यवस्थापन तथा स्वयंसेवा गरिएको थियो।
कार्यक्रमका अवसरमा दुर्गा भगवती आमा समूहकी सचिव जयन्ती खनालले बैंकप्रति धन्यवाद ज्ञापन गर्दै आगामी दिनहरूमा पनि यस्ता सामाजिक उत्तरदायित्वमूलक कार्यक्रमहरू निरन्तर सञ्चालन हुने अपेक्षा व्यक्त गर्नुभयो।
२०६४ सालमा स्थापना भएको सिटिजन्स बैंकका हाल देशभर २०० शाखा, १६९ एटिएम, ३ एक्सटेन्सन काउन्टर तथा ४२ शाखारहित बैंकिङ सेवा सञ्चालनमा रहेका छन्। करिब २० लाख ग्राहकलाई सेवा प्रदान गर्दै आएको बैंकले फोनपेसँगको सहकार्यमा नेपालमै पहिलो पटक भर्चुअल क्रेडिट कार्ड सेवा सञ्चालनमा ल्याएको छ।
बैंकले आफ्नो सेवा तथा कार्यसम्पादनका आधारमा राष्ट्रिय तथा अन्तर्राष्ट्रिय स्तरमा विभिन्न सम्मानहरू प्राप्त गर्दै आएको जनाएको छ।