नवलपरासी – बुटवल–नारायणगढ सडक विस्तार आयोजनाअन्तर्गत नवलपरासी (बर्दघाट सुस्ता पूर्व) को दुम्कीवास विनयी खोलामा निर्माण भएको नयाँ पक्की पुल सञ्चालनमा आएको छ ।
निर्माण कार्य सम्पन्न भएसँगै आजदेखि पुलमार्फत गाडी चल्न थालेका बुटवल–नारायणगढ सडक आयोजना पूर्वी खण्डका इन्जिनियर शिव खनालले बताउनुभयो । विनयी त्रिवेणी गाउँपालिका–१ दुम्कीवासमा रहेको झन्डै २४५ मिटर लम्बाइको विनयी खोलामा पुल निर्माण सम्पन्न भई गाडीको आवागमन शुरू भएको उहाँले बताउनुभयो ।
यसअघि त्यही ठाउँमा रहेको फलामे पुल झन्डै दुई वर्षअघि भत्किएपछि अस्थायी डाइभर्सनमार्फत गाडी सञ्चालन हुँदै आएका थिए । डाइभर्सन प्रयोग गर्दा वर्षायाममा बाढीका कारण पटक–पटक आवागमन अवरुद्ध हुने समस्या थियो ।
योसँगै नारायणगढ–बुटवल सडक आयोजनाअन्तर्गत पूर्वी खण्डका सबै पुल तथा कल्भर्ट निर्माण कार्य सम्पन्न भएको इन्जिनियर खनालले बताउनुभयो । पूर्वी खण्डमा १२ ठूला र २२ साना पुल निर्माण सम्पन्न भएका उहाँको भनाइ छ ।
पूर्वी खण्डमा निर्माण गर्नुपर्ने २११ कल्भर्टसमेत पूर्णरूपमा सम्पन्न भइसकेका छन् । बुटवल–नारायणगढ सडक खण्डको गैँडाकोटदेखि दुम्कीवाससम्मको सडक निर्माण कार्य अन्तिम चरणमा पुगेको छ ।
आयोजनाको पूर्वी खण्डअन्तर्गत दाउन्ने खण्डको मात्र काम बाँकी रहेको छ भने अन्य क्षेत्रको काम अन्तिम चरणमा पुगेको इन्जिनियर खनालले जानकारी दिनुभयो । उहाँका अनुसार पूर्वी खण्डमा अहिलेसम्म ८१ प्रतिशत भौतिक प्रगति भएको छ ।