लेखापढी व्यवसायलाई मर्यादित बनाउनका लागि बुटवलमा १६ दिने तालिम सञ्चालन भएको छ । बुटवल उपमहानगरपालिकाको आयोजनामा रुपन्देही जिल्लाभित्रका लेखापढी व्यवसायमा इच्छुकका लागि तालिम प्रदान गरिएको हो । सो व्यवसायका लागि आवश्यक करिब ४५ वटा विषयमा तालिम प्रदान गरिएको बुटवल उपमहानगरपालिका श्रम तथा रोजगार शाखाका रोजगार संयोजक अरविन्द पाण्डेले जानकारी दिनुभयो । तालिममा रुपन्देही जिल्लाभित्रका करिब ४० जना प्रशिक्षार्थीहरुको सहभागिता रहेको छ ।
कार्यक्रममा प्रशिक्षक अधिवक्ता घनश्याम पन्थले प्रशिक्षण दिनुभएको संयोजक पाण्डेले बताउनुभयो ।
तालिममा लेखापढी व्यवसायीको लागि कार्यालयतर्फ र लिखितर्फ विभिन्न ४५ विषयमा जानकारी दिइएको प्रशिक्षक पन्थले बताउनुभयो । अड्डा अदालत , लेनदेन , अंशवण्डा राजिनामा , बकस पत्र तथा स्थानीय तहलगायतका विभिन्न विषयमा जानकारी दिइएको हो । यही चैत २७ गते समापन हुने तालिममा अन्य प्रशिक्षकको रुपमा अधिवक्ता दुर्गाप्रसाद पाण्डे , ज्ञानु केसी , राजन नेपाल , गोविन्द प्रसाद मरासिनी , मदन कुमार पुन , मिना पाण्डे पन्थ , अनुप पोखरेल , सहायक न्यायाधिवक्ता गोकर्ण घिमिरे , बसन्तराज पोखरेल र शाखा अधिकृत नारायण पन्थी रहनुभएको श्रम तथा रोजगार शाखा संयोजक पाण्डेले जानकारी दिनुभयो ।
