अस्ट्रेलियाको १२५ वर्ष लामो सैनिक इतिहासमा पहिलोपटक महिलाले सेनाको नेतृत्व सम्हाल्ने हुनु भएको छ । रक्षामन्त्री रिचर्ड मार्लेसले लेफ्टिनेन्ट जनरल सुसान कोयललाई अस्ट्रेलियाली सेनाको प्रमुखमा नियुक्त गरिएको जानकारी दिनुभएको अन्तर्राष्ट्रिय समाचार संस्था एएफपीले जनाएको छ ।
झन्डै तीन दशक लामो सेवाका क्रममा ५५ वर्षीया कोयलसँग सोलोमन टापु, अफगानिस्तान र मध्यपूर्वमा काम गरेको अनुभव छ । रक्षामन्त्री मार्लेसकाअनुसार यो नियुक्ति केवल व्यक्तिगत उपलब्धि नभई सम्पूर्ण संस्थागत परिवर्तनको प्रतीक हो ।
अस्ट्रेलियाली सेना अहिले व्यापक रूपान्तरणको चरणमा छ । लामो दूरीका आक्रमण क्षमतादेखि ड्रोन प्रविधि र आधुनिक युद्ध प्रणालीसम्ममा केन्द्रित हुँदै सेनाले आफ्नो संरचना अद्यावधिक गरिरहेको छ । यस्तो परिवर्तनको नेतृत्व गर्न कोयलको अनुभव महत्त्वपूर्ण मानिएको छ ।
आफ्नो नियुक्तिपछि कोयलले आधुनिक युद्धका नयाँ आयामहरू, विशेषगरी साइबर युद्धजस्ता क्षेत्रमा आफूले काम गरेको अनुभव उपयोगी हुने विश्वास व्यक्त गर्नुभयो । उहाँ आउँदो जुलाईमा सेना प्रमुख बन्नुहुनेछ ।
यो नियुक्तिलाई लैङ्गिक समानता र समावेशी नेतृत्वतर्फको महत्त्वपूर्ण कदमका रूपमा पनि हेरिएको छ । अस्ट्रेलियाली सेनामा परम्परागत रूपमा पुरुष वर्चस्व रहँदै आएको अवस्थामा कोयलको उदयले संस्थागत संस्कृतिमा दीर्घकालीन प्रभाव पार्ने अपेक्षा छ ।