बुटवलमा मेयर युवा रोजगार प्रवर्द्धन कार्यक्रमअन्तर्गत सञ्चालनमा रहेको लेखापढी व्यवसायका लागि १६ दिने तालिमको समापन भएको छ ।
लेखापढी मर्यादित बनाउनका लागि प्रदान गरिएको तालिमको शुक्रबार एक कार्यक्रमका बिच समापन गरिएको हो ।
बुटवल उपमहानगरपालिकाको आयोजनामा रुपन्देही जिल्लाभित्रका लेखापढी व्यवसायमा इच्छुकका लागि तालिम प्रदान गरिएको हो ।
कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेले महिलाहरूलाई स्वरोजगार बनाउन यस्ता तालिमले महत्त्वपूर्ण भूमिका खेल्ने बताउनुभयो । पाण्डेले महिलाहरुको लागि सीप र रोजगार सबैभन्दा महत्त्वपूर्ण रहेको उल्लेख गर्दै कुनै न कुनै सीपसँग महिला जोडिन जरुरी रहेको बताउनुभयो ।नगरले प्रदान गरेको यो तालिमबाट तालिम लिएका महिलाहरु स्वरोजगार हुने अपेक्षा रहेको जनाउनुभयो ।
तालिममा लेखापढी व्यवसायका लागि आवश्यक करिब ४५ वटा विषयमा तालिम प्रदान गरिएको बुटवल उपमहानगरपालिका श्रम तथा रोजगार शाखाका रोजगार संयोजक अरविन्द पाण्डेले जानकारी दिनुभयो । तालिममा रुपन्देही जिल्लाभित्रका करिब ४० जना प्रशिक्षार्थीहरुको सहभागिता रहेको छ ।
कार्यक्रममा प्रशिक्षक अधिवक्ता घनश्याम पन्थले प्रशिक्षण दिनुभएको संयोजक पाण्डेले बताउनुभयो ।
तालिममा लेखापढी व्यवसायीको लागि कार्यालयतर्फ र लिखितर्फ विभिन्न ४५ विषयमा जानकारी दिइएको प्रशिक्षक पन्थले बताउनुभयो । अड्डा अदालत , लेनदेन , अंशवण्डा राजिनामा , बकस पत्र तथा स्थानीय तहलगायतका विभिन्न विषयमा जानकारी दिइएको हो ।
बुटवल उपमहानगरपालिका वडा नम्बर १९ पत्थरगञ्जकी मञ्जु खनालले तालिमले प्रभावकारी भूमिका खेलेको बताउनुभयो । त्यस्तै बुटवल २ कि वसन्ती बस्यालले महिला सशक्तीकरणमा यस तालिम महत्त्वपूर्ण रहेको बताउनुभयो ।
तालिममा अन्य प्रशिक्षकको रुपमा अधिवक्ता दुर्गाप्रसाद पाण्डे , ज्ञानु केसी , राजन नेपाल , गोविन्द प्रसाद मरासिनी , मदन कुमार पुन , मिना पाण्डे पन्थ , अनुप पोखरेल , सहायक न्यायाधिवक्ता गोकर्ण घिमिरे , बसन्तराज पोखरेल र शाखा अधिकृत नारायण पन्थी रहनुभएको श्रम तथा रोजगार शाखा संयोजक पाण्डेले जानकारी दिनुभयो ।