रुपन्देही, तिलोत्तमा ३ योगीकुटी सुर्यवंशी पथमा स्वास्थ्य सेवामा नयाँ अभ्यासको रूपमा ‘हेल्थ एट होम’ (घरमै स्वास्थ्य सेवा) सुरु गरिएको छ। ”परिवार टाढा भए पनि हामी नजिक छौ”भन्ने स्लोगन ले सार्थकता पाउने गरि सेवा दिइने विश्वास गरिएको छ  ।

स्वास्थ्य सेवामा नयाँ अभ्यासका रूपमा सुरु गरिएको ‘हेल्थ एट होम’ (घरमै स्वास्थ्य सेवा)कार्यक्रम वरिष्ठ चिकित्सक डा. नन्दु पाठकले रिबन काटेर उद्घाटन गर्नुभएको छ। उहाँले यो सेवा बिरामीमैत्री अवधारणामा आधारित रहेको उल्लेख गर्दै स्वास्थ्य क्षेत्रमा नयाँ र आवश्यक कदम भएको बताउनुभयो। उद्घाटन कार्यक्रममा बोल्दै डा. पाठकले घरमै स्वास्थ्य सेवा उपलब्ध गराउने यो पहलले विशेषगरी ज्येष्ठ नागरिक, दीर्घरोगी तथा अस्पतालसम्म पुग्न कठिनाइ हुने बिरामीहरूलाई ठूलो राहत दिने विश्वास व्यक्त गर्नुभयो।

हेल्थ एट होम का एमडी निरञ्जन पोखरेलका अनुसार नेपालमा यस प्रकारको व्यवस्थित र समग्र ‘होम हेल्थ केयर’ सेवा पहिलो पटक सुरु गरिएको हो । उनले विकसित देशहरूमा यस्ता सेवाहरू पहिले नै लोकप्रिय रहेको उल्लेख गर्दै नेपालमा पनि यसको आवश्यकता बढ्दै गएको बताए। वैदेशिक रोजगारी,“व्यस्त जीवनशैली, ज्येष्ठ नागरिकको बढ्दो संख्या र दीर्घरोगी बिरामीहरूको सुविधालाई ध्यानमा राखेर यो सेवा सुरु गरेको बताउनु भयो ।

संस्थाका सञ्चालक मिम बहादुर सिंहका अनुसार ‘हेल्थ एट होम’ सेवा अन्तर्गत बिरामीको घरमै डाक्टर तथा नर्स पुगेर स्वास्थ्य परीक्षण गर्ने व्यवस्था गरिएको छ। यससँगै प्रयोगशाला परीक्षणका लागि आवश्यक नमुना घरमै संकलन गर्ने, औषधि घरमै पुर्‍याउने तथा आवश्यक स्वास्थ्य परामर्श दिने सुविधा पनि उपलब्ध गराइएको छ। सेवामा मानसिक स्वास्थ्य र मनोपरामर्शलाई समेत प्राथमिकतामा राखिएको छ। तनाव, चिन्ता तथा डिप्रेसनजस्ता समस्याबाट ग्रसित व्यक्तिहरूलाई विशेषज्ञमार्फत घरमै वा अनलाइनमार्फत परामर्श दिने व्यवस्था गरिएको छ। साथै, फिजियोथेरापी सेवा पनि घरमै उपलब्ध गराइने भएकाले हाडजोर्नी तथा चोटपटकका बिरामीहरूका लागि यो सेवा अझ उपयोगी हुने अपेक्षा गरिएको छ। त्यसैगरी, दीर्घरोगी तथा शारीरिक रूपमा अशक्त बिरामीहरूका लागि आवश्यक पर्ने स्वास्थ्य उपकरणहरू—जस्तै अक्सिजन सिलिन्डर, बेड, व्हीलचेयर लगायतका सामग्री घरमै उपलब्ध गराउने व्यवस्था गरिएको सञ्चालक सिंहले जानकारी दिए। यसले बिरामीको हेरचाहलाई अझ सहज बनाउने विश्वास गरिएको छ।

‘हेल्थ एट होम’ सेवाले डिजिटल प्रविधिलाई विशेष प्राथमिकता दिएको छ। सेवाग्राहीले मोबाइल एप वा वेबसाइटमार्फत आफूलाई आवश्यक पर्ने सेवा छनोट गर्न, डाक्टरसँग भेट्ने समय बुक गर्न तथा अनलाइनमार्फत विशेषज्ञसँग परामर्श लिन सक्नेछन्। विदेशमा रहेका आफन्तहरूले समेत आफ्ना परिवारका सदस्यहरूको स्वास्थ्य अवस्थाबारे जानकारी लिन र परामर्शको व्यवस्था मिलाउन सक्ने सुविधा रहेको बताइएको छ। कोरोना महामारीपछि स्वास्थ्य सेवामा आएको परिवर्तनसँगै घरमै सेवा लिने प्रवृत्ति बढ्दै गएको छ। यस्तो अवस्थामा ‘हेल्थ एट होम’ जस्ता सेवाले स्वास्थ्य प्रणालीलाई थप सुलभ, प्रभावकारी र पहुँचयोग्य बनाउन सहयोग पुर्‍याउने विश्वास गरिएको छ।

विशेषगरी ज्येष्ठ नागरिक, दीर्घरोगी, अपांगता भएका व्यक्ति तथा अत्यधिक व्यस्त जीवनशैली भएका व्यक्तिहरूका लागि लक्षित गरिएको यो सेवा अहिले बुटवल, तिलोत्तमा र सैनामैनामा  र आगामी दिनमा विस्तार गर्दै अन्य जिल्लाहरूमा पनि पुर्‍याउने योजना रहेको एमडी निरञ्जन पोखरेलले बताए । डा .चन्द्रकान्त घिमिरेले यो सेवाले यसक्षेत्रका नागरिकहरुलाई उपचार पाउनमा थप सहज हुने बताउनु भएको थियो ।