तिलोत्तमा – रुपन्देहीको तिलोत्तमा वडा नम्बर १ मा आयमूलक तालिमअन्तर्गत मादल बजाउने तथा झोला बनाउने प्रशिक्षण सम्पन्न भएको छ । वडा नम्बर १ का महिलाहरुको सहभागितामा वडा कार्यालयको आयोजनामा १५ दिने प्रशिक्षण सम्पन्न भएको हो ।
कार्यक्रममा बोल्दै प्रमुख अतिथि तिलोत्तमा नगरपालिकाका उपप्रमुख जगेश्वर देवी चौधरीले तालिमहरु धेरै भएको बताउँदै त्यी तालिमलाई व्यवहारमा उतार्न आग्रह गर्नुभयो । उपप्रमुख चौधरीले नगर सधै रोजगारी सृजना गर्नेतर्फ अग्रसर रहेको बताउँदै रोजगारीमार्फत महिलाहरुको आर्थिक अवस्थामा सुधार ल्याई लैंगिक हिंसाका घटना न्यूनीकरण हुने बताउनुभयो ।
वडा नम्बर १ का अध्यक्ष फर्सुराम गिरीले महिलाहरुलाई आत्मनिर्भर बनाउने उदेश्यले कार्यक्रम गरेको बताउनुभयो । अध्यक्ष गिरीले प्रशिक्षणले महिलाहरुलाई उद्यमी बनाउने अपेक्षा गर्नुभयो । कार्यक्रममा प्रशिक्षक रञ्जित भण्डारीले तालिमलाई व्यवहारमा उतार्न आग्रह गर्नुभयो ।
वडा सदस्य हिरादेवी बिकले आफूले सिकेका कुरा अरुलाई पनि सिकाउन र पुरुषले मात्रै गर्न भनिएको काम महिलाले पनि गर्न सक्छन् भन्दै यो तालिम प्रदान गरिएको बताउनुभयो ।
कार्यक्रममा वडा सदस्य गितादेवी न्यौपाने , विष्णुप्रसाद पाण्डे , टोल विकास सञ्जाल अध्यक्ष टोपलाल भण्डारी , नमस्ते बाल बचाऊका अध्यक्ष जगन्नाथ बस्याललगायतको उपस्थिति रहेको सचिव हेमलाल न्यौपानेले बताउनुभएको थियो ।
झोला बनाउने तालिममा विभिन्न ७ प्रकारका झोलाहरु बनाउन सिकाइको प्रशिक्षक अनु कुमारी कुमालले बताउनुभयो । तालिममम स्कुल ब्याग , सपिङ ब्याग , अफिस ब्याग , साइड मनि ब्याग , ल्यापटप ब्याग बनाउन सिकाइएको थियो । दुबै तालिममा करिब ५० जना प्रशिक्षार्थीहरुको सहभागिता रहेको थियो । सहभागीहरुले तालिम प्रभावकारी भएको र तालिमलाई व्यवसायिक बनाउने प्रतिवद्धता जनाएका छन् ।