बुटवल-स्कुल गट ट्यालेन्ट २०८२ को उपाधि अक्सफोर्ड सेकेण्डरी स्कुल बुटवलका अंकित गौतमले जितेका छन् । फाइनल राउन्डमा पुगेका ८ जना प्रतिष्पर्धीलाई पछाडि पार्दै गौतमले उपाधिसँगै नगद रु ५५०००, मेडल, शिल्ड हात पारेका हुन् । साथै श्रीनगर फिल्मस प्रालि बुटवलबाट निर्माण हुने म्युजिक भिडियोमा अभिनय गर्ने अवसर प्राप्त गरेका छन् ।
वागेश्वरी कला तथा संगीत एकेडेमी बुटवलको आयोजनामा भएको कार्यक्रममा ग्लोरी स्कुलकी अध्यता भण्डारी फस्ट रनर अप हुँदै रु ३५००० नगद पुरस्कारका साथै शिल्ड मेडेल प्राप्त गरेकी छन् । त्यसैगरी मणिमुकुन्द स्कुलकी दिया सारु सेकेन्ड रनर अप भई रु २५००० प्राप्त गर्न सफल भएकी छन्। यसैगरी बुद्ध दीप स्कुलका आयुस सुनार सान्त्वना भएका छन् ।
विगत २६ वर्षदेखि बुटवलमा सञ्चालनमा रहेको एकेडेमीले नयाँ पुस्ताका विद्यार्थीहरुलाई लक्षित गरी बालबालिकामा रहेको अन्तर्निहित क्षमतालाई प्रस्फुटन गराउने उद्देश्यले यो प्रतियोगिता आयोजना गरेको एकेडेमीकी सञ्चालक लालिमा श्रेष्ठले बताउनुभयो । श्रेष्ठले गट ट्यालेन्ट प्रतियोगिताअन्तर्गत रुपन्देहीका विभिन्न विद्यालयका विद्यार्थीहरुले नृत्य, गायन, वाद्यवादन, अभिनय-नाटक, कमेडी, र्यापजस्ता विधामा प्रतिस्पर्धा गरेका थिए ।
सहभागी विद्यार्थीहरुलाई विभिन्न ५ वटा चरणमा प्रतिस्पर्धा गराइएको एकेडेमीका म्यानेजर सुमन गहतराजले जानकारी दिनुभयो । उहाँका अनुसार ग्राउन्ड अडिसन, मेघा अडिसन, वर्कसप, सेमीफाइनल हुँदै नृत्य विधातर्फ ६ जना र गायन विधातर्फ ३ जना गरी ९ जना फाइनल प्रतिस्पर्धाका लागि छनोट भएका थिए । ‘नो भोट, नो एसएमएस’भन्ने मूल नारासहित सम्पन्न भएको प्रतियोगिताको निर्णायकमा मनिष सारु र विनोद चौधरी रहनुभएको थियो ।
सोही अवसरमा बोल्दै नृत्य निर्देशक संघ नेपालका केन्द्रीय अध्यक्ष भुवनदास श्रेष्ठले विद्यार्थीहरूभित्र लुकेको कुनै पनि प्रतिभालाई उजागर गर्न यस्ता ट्यालेन्ट सोले महत्वपूर्ण भूमिका खेल्ने बताउनुभयो । उहाँले आगामी दिनमा पनि यस्ता प्रतियोगिताहरुलाई निरन्तरता दिन आग्रहसमेत गनुभयो ।