बुटवल – स्कुल गट ट्यालेन्ट रुपन्देहीको दोस्रो राउण्ड मेघा अडिसनको पहिलो चरण सकिएको छ । वागेश्वरी कला तथा संगीत एकेडेमी बुटवलको आयोजनामा भएको कार्यक्रमको ग्राउण्ड अडिसनबाट छनौट भएका प्रतिष्पर्धीहरुको मेघा अडिसन भएको हो ।
एकेडेमीले रुपन्देहीमा रहेका विभिन्न विद्यालयमा अध्ययनरत विद्यार्थीहरुबिच ग्राउण्ड अडिसन गरेको थियो । दोस्रो राउण्डअन्तर्गत मेघा अडिसनको दोस्रो र तेस्रो चरण आगामी शनिबार १३ गते र अर्को शनिबार २० गते हुने एकेडेमीका सञ्चालक लालिमा श्रेष्ठले बताउनुभयो । कार्यक्रममा छुटेका विद्यार्थीहरुको ग्राउण्ड अडिसन अझै पनि जारी रहेको श्रेष्ठले जानकारी दिनुभयो ।
विद्यार्थीभित्र लुकेर रहेको अन्तरनिहित प्रतिभालाई प्रष्फुटन गर्न कार्यक्रम गरिएको सञ्चालक श्रेष्ठको भनाइ छ । कार्यक्रम पाँच चरणमा सकिनेछ । ग्राउण्ड अडिसनपछि मेघा अडिसन रहनेछ । मेघा अडिसन राउन्डमा छनौट भएका प्रपिष्पर्धी वर्कसपमा प्रवेश गर्नेछन् । वर्कसपबाट छनौट भएका प्रतिष्पर्धी सेमिफाइनल र सेमिफाइनलबाट छनौट भई फाइनलमा पुग्नेछन् ।
कार्यक्रमको उपाधि जित्ने प्रतिष्पर्धीले नगद रु ५५००० पुरस्कार प्राप्त गर्नेछन् । दोस्रो हुनेले रु ३५००० र तेस्रो हुनेले रु २५००० पुरस्कार प्राप्त गर्ने एकेडेमीले जनाएको छ । पछिल्लो समय एकेडेमीमा निरन्तर नृत्य ,गायन , बाध्यवादन र चित्रकलाका कक्षाहरु सञ्चालन भैरहेका छन् ।