तिलोत्तमा – जातिय विभेदविरुद्ध सामाजिक अन्तरघुलन कार्यक्रमको समापन गरिएको छ । तिलोत्तमा नगरपालिकाको आयोजना र सामुदायिक जागरण विकास मञ्च, रुपन्देहीको व्यवस्थापनमा सञ्चालित अभियान तिलोत्तमा नगरपालिका वडा नं ४ मा समापन भएको हो ।
कार्यक्रममा बोल्दै तिलोत्तमा नगरपालिका वडा नम्बर ४ का अध्यक्ष हरि बहादुर क्षेत्रीले जातिय विभेद मानव समुदायको लागि कलंक र सामाजिक अपराध भएकाले टोलमा सबैले समान व्यवहार गर्नुपर्ने बताए । क्षेत्रीले महिला र पुरुष मात्रै जात भएकाले समाजमा कहीँ कतै जातीय विभेद गरेको पाइएमा वडामा खबर गर्न आग्रह गर्दै त्यस्ता व्यक्तिलाई कडा कारबाही गरिने बताए ।
तिलोत्तमा नगरपालिकाका योजना शाखा अधिकृत माधव पोख्रेलले प्रशिक्षण दिदै २१ औं शताब्दीमा पनि अझै पनि दलित समुदायमाथि जातिय विभेदका घटनाहरु भएको बताए । उनले स्थानीय तह, प्रदेश र संघीय सरकारले विभेद न्यूनीकरणका लागि सबै पालिकामा सचेतनामूलक कार्यक्रम गर्नुपर्ने बताए ।
तिलोत्तमा नगरपालिकाका सामाजिक विकास समिति संयोजक तथा कार्यपालिका सदस्य रवि सेञ्चुरीले जातिय विभेद अन्त्यका लागि तिलोत्तमा नगरपालिकाले आफ्नो नीति तथा कार्यक्रममै समावेश गरी बजेट नै छुट्टाएर विभिन्न वडामा सामाजिक अन्तरघुलन कार्यक्रम गरिएको बताए । उनले तिलोत्तमा नगरपालिका वडा नं। ६, १४, १० , ९, ८ र ४ वडा गरी पालिकाका ६ वटा वडामा सामाजिक अन्तरघुलन कार्यक्रम गरिएको बताउँदै सबै प्रकारको विभेद अन्त्यका लागि टेवा पुग्ने बताए ।
सामुदायिक जागरण विकास मन्चका अध्यक्ष राम बहादुर विश्वकर्माले दलित समुदायलाई धारा, मठ मन्दिरमा प्रवेश गर्दा जातिय विभेदका घटना घट्ने क्रम बढेको बताउँदै त्यसको अन्त्य गरी समतामुलक समाज निर्माणका लागि पहल गर्नुपर्ने बताए । तिलोत्तमा नगरपालिकाले चैत ११ देखि २० गतेसम्म पालिकाका विभिन्न वडामा जातिय विभेदविरुद्ध सामाजिक अन्तरघुलन कार्यक्रम गरेको थियो । सो कार्यक्रममा अवधिभर करिब ३ सय २१ जनाको सहभागिता रहेको थियो ।
नगरपालिकाका सामाजिक विकास समिति संयोजक रवि सेञ्चुरीको अध्यक्षता रहेको कार्यक्रममा नगरपालिकाका वडा नं-४ का वडा अध्यक्ष हरि बहादुर क्षेत्रीको प्रमुख आतिथ्यता रहेको र कार्यक्रम तिलोत्तमा-४ का वडा सचिव काशिराम ज्ञवालीले सञ्चालन गरेका थिए ।
